Körfuknattleikslið Vals í dominosdeildina
Körfuknattleikslið Vals tryggði sér í gær sæti í dominosdeild karla á næsta tímabili með ótrúlegum 109-62 sigri á Hamar frá Hveragerði.
Það var ljóst að lærisveinar Ágústs Björgvinssonar ætluðu að selja sig dýrt og komu þeir gríðarlega ákveðnir til leiks í fyrsta leikhluta. Hamar fann engar glufur á sterkri vörn heimamanna og Valur skoraði nánast af vild fyrstu 10 mínúturnar. Það fór því svo að Valur leiddi 32-9 eftir fyrsta leikhluta og var sigurinn í raun aldrei í hættu eftir það.
Valsmenn fögnuðu vel í lok leiks og líklega enginn jafn mikið og þjálfari liðsins Ágúst Björgvinsson: "Tilfinningin er mjög góð, auðvitað skrítið að vera nánast kominn með sigur í hálfleik sem er ólíkt síðasta oddaleik sem við fórum í gegn Breiðablik." Aðspurður hvort það verði miklar breytingar á liðinu fyrir næsta tímabil sagði Gústi:"Ég vona ekki, við héldum nánast sama kjarna frá því í fyrra fyrir þetta tímabil. Við erum með rosalega góða breidd en mögulega þurfum við að styrkja okkur eitthvað."
Framlag Valsmanna í leiknum: Austin Magnus Bracey 33/6 fráköst, Urald King 24/16 fráköst/4 varin skot, Sigurður Páll Stefánsson 9/4 fráköst, Birgir Björn Pétursson 8/5 fráköst, Ingimar Aron Baldursson 8, Illugi Steingrímsson 7, Sigurður Dagur Sturluson 5/5 fráköst, Oddur Birnir Pétursson 5/5 stoðsendingar, Illugi Auðunsson 4, Snjólfur Björnsson 2, Þorgeir Kristinn Blöndal 2/7 fráköst, Benedikt Blöndal 2/4 fráköst/7 stoðsendingar.
Valur.is óskar liðinu og öllum sem að því standa hjartanlega til hamingju með árangurinn.
Mynd: karfan.is