Valsstelpurnar í handbolta - Pistill

Valsstelpurnar hafa ekki tekið þátt í neinum haustmótum og því rennum við dálítið blint í sjóinn um það hvernig horfi með fyrstu leiki
liðsins.  Þær náðu sér í smá forrétt þegar þær lögðu Fram með einu marki í fyrsta stórleik haustsins, meistarar meistaranna.  Kvennaliðið er sem fyrr undir stjórn Stefáns Arnarsonar en samstarfsmaður hans er okkar ástsæli og endurheimti Óskar Bjarni Óskarsson. 

Þau gleðitíðindi berast úr herbúðum Valsstelpna að þrír lykilleikmenn eru að snúa aftur eftir barnsburð.  Kristín Guðmundsdóttir eignaðist sitt þriðja barn í byrjun árs, Rebekka Rut sitt fyrsta í byrjun júlí og Anna Úrsúla (og Finnur Ingi vitaskuld) sitt fyrsta í byrjun ágúst.  Áhugamenn um merkur og sentimetra verða að bera sig upp við foreldrana en þegar ég hef spurt mæðurnar hvernig gangi þá
mætir mér sólskinsbros.  Við samgleðjumst vitaskuld með ósk um hamingju á stækkandi fjölskyldur og sendum gússí-gússí á
krílin.  Það má alveg vekja athygli á því að stelpurnar eru að skrifa nýja kafla í íþróttasöguna.  Mér er til efs að það hafi verið íþróttalið í fremstu röð á Íslandi sem hefur haft á að skipa öðrum eins fjölda af mæðrum líkt og kvennalið Vals.  Fyrir fáum árum síðan var mjög algengt að konur lykju íþróttaferli sínum á meðgöngu með fyrsta barn en Valsstelpurnar hafa hver á fætur annarri sýnt fram á að það er vel hægt að stunda keppnisíþróttir í fremstu röð eftir barnsburð. 

Nokkrar stelpur úr þriðja flokki eru byrjaðar að banka á dyrnar en þær Guðrún Lilja Gunnarsdóttir, Morgan Marie Þorkelsdóttir og Vigdís Birna Þorsteinsdóttir sem komu við sögu í nokkrum leikjum í fyrra fá væntanlega að spila meira í vetur.  Þess utan er Bryndís Wöhler sem er við það að vaxa upp úr þriðja í fantaformi og líkleg til að festa sig í sessi sem fastur leikmaður í liðinu.

En við sjáum á bak nokkrum leikmönnum sem voru með okkur í fyrra.  Sonata er farin heim til Lithaugalands.  Þorgerður Anna er komin í atvinnumennskuna til Noregs.  Kolbrún, Drífa og Dagný eru í pásu en Heiðdís er farin í FH.  Við þökkum þeim sem hafa sagt skilið við okkur innilega fyrir sitt framlag sem er ekki lítið.  Kvennahandboltinn í Val hefur dregið marga silfurgripi í hús á síðastliðnum árum og stelpurnar hafa allar sem ein lagt sitt af mörkum við það.

Gherman Marinela Ana heitir nýjasti leikmaður okkar.  Hún er kölluð Mary og er mjög flottur leikmaður, hún sýnir léttan skandinavískan fótaburð í vörninni en er líka öflug skytta.  Öll hennar tilþrif minna mig á góðan leikmann af Norðurlöndunum fremur en t.d. þá rúmensku leikmenn sem spiluðu með Zalau gegn okkur í fyrra vetur.  Mary er uppalin í hlíðum Karpatafjallanna í Rúmeníu en frægasti sveitungi hennar er án nokkurs vafa Drakúla greifi.  Það verður því fróðlegt að sjá hvort hún geti bitið frá sér líkt og svartklæddi sveitunginn.  Við skulum fylgjast vel með varnartilbrigðum hennar, sérstaklega í kvöldleikjunum.  Það fylgir henni það
orðspor að hún sé öflug í vörninni og kannski er skýringin af yfirskilvitlegum og ævintýralegum toga.  Það er aðeins ein leið að komast að hinu sanna, það er að mæta á leiki og fylgjast með hvernig leikirnir ganga fyrir sig.

Mörgum okkar er í fersku minni þegar Hrafnhildur Skúladóttir, fyrirliði stelpnanna, skammaði stuðningsmenn fyrir lélega mætingu
þegar úrslitakeppnin stóð sem hæst síðastliðið vor.  Þegar ég sé Hrafnhildi í slíkum ham þá finnst mér að öllum (sérstaklega karlmönnum) beri skylda til að hlýða.  Að öðrum kosti megi búast við snerru sem væri unnt að lýsa með tilvitnun í Njálu á borð við Skaltu það muna, vesæll maður, meðan þú lifir að kona hefur...  Ykkur til frekari upplýsingar þá hef ég séð til Hröbbu í þreksalnum og þar fer enginn aukvisi.  En að öllu gamni slepptu hvet ég ykkur til að Mæta á leiki stelpnanna sem verðskulda góðan stuðning eftir frábæra frammistöðu á síðustu árum.  Fyrsti leikur þeirra er núna í Vodafonehöllinni á laugardaginn 21. september kl. 13:30.  Hittumst þar öll!

Áfram Valur!

Sigurður Ásbjörnsson







Athugasemdir