Endurtekið efni í Austurbergi
Það var hart barist í Austurbergi í gærkvöld þegar við Valsmenn litum í heimsókn í annað sinn á rúmum þremur vikum. Síðasta viðureign liðanna var gríðarlega spennandi og lyktaði með eins marks sigri ÍR eftir mark á loka sekúndum.
Í kvöld var algjört jafnræði með liðunum fyrstu 10 mínútur leiksins en þá skoruðum við fjögur mörk í röð og komumst í 9 - 5. En eftir fjögurra marka sprett ÍR-inga undir lok hálfleiksins náðu þeir að minnka muninn í eitt mark. Staðan í hálfleik var því 15 - 14 fyrir Val.
Í seinni hálfleik leit þetta lengst af ljómandi vel út. Valsmenn unnu í því hægt og bítandi að auka forskotið og þegar rúmar 16 mínútur voru liðnar af hálfleiknum var staðan 21 - 18 fyrir Val. En þá hrundi sóknarleikur liðsins. Það sem eftirlifði leiks skoraði Valsliðið eingöngu tvö mörk en fékk á sig sjö. Þar af fékk sami leikmaður ÍR, Davíð Georgsson, sem ekkert hafði komið við sögu í leiknum að fara í gegnum Valsvörnina á sama stað fjórum sinnum í röð og skoraði hann í öll skiptin. Leiknum lauk því með sigri ÍR, 25 - 23.
En hvernig stendur á því að við náum ekki að klára leikinn? Voru menn orðnir svona þreyttir? Það var mjög lítil sköpun í gangi í sókninni í lokin. Við horfðum ítrekað upp á andvana fædd einstaklingsframtök og skoruðum ekki úr dauðafærum þá sjaldan að þau fengust. Við notuðum níu útispilara í leiknum. Agnar, Atli og Magnús komu ekkert við sögu. Nánast allan leikinn spiluðum við 3-3 vörn. En hún er mjög krefjandi þar sem langt bil er á milli varnarmanna og þeir verða að vera mjög einbeittir og vera á miklu meiri hreyfingu heldur en í flatri vörn. En það fór ekkert á milli mála að eftir leikinn voru allir leikmenn beggja liða orðnir uppgefnir. Margir stuðningsmanna Vals urðu menn snemma pirraðir út í Nikola fyrir þrjár mislukkaðar sendingar og misgrip (hann greip ekki sendingu) á fyrsta korteri leiksins. En á sama tíma átti hann þrjár sendingar inn á línuna og skoraði sjálfur tvö mörk. Úrslitunum verður ekki klínt á hann.
En Valsliðið verður að sýna fram á að það geti klárað leiki. Það er óþolandi að horfa upp á andstæðinga okkar stela ýmist einu eða tveimur stigum í lok hvers einasta leiks.
Helstu tölur: Hlynur varði 18 skot. Mörk Vals: Orri 6, Finnur Ingi 4, Nikola 4, Valdimar Fannar 3, Svenni 2, Agnar 1, Þorgrímur 2, Gunnar Malmquist 1 og Fannar Þorbjörnsson 1.
Næsti leikur strákanna er í Vodafonehöllinni á Hlíðarenda gegn Fram fimmtudaginn 28. febrúar kl. 19:30.
Áfram Valur!
Sigurður Ásbjörnsson