Afgerandi sigur á Haukum - Pistill
Þá er úrslitakeppnin hafin í N1-deild kvenna. Landsleikjahléinu er lokið og átta efstu liðin í deildinni keppa innbyrðis í úrslitakeppni um Íslandsmeistaratitilinn. Þar sem Valsstelpurnar urðu efstar í deildinni þá tryggir það þeim heimavallarrétt sem þýðir að ef Valur þarf oddaleiki til að komast áfram þá fara þeir leikir fram á Hlíðarenda. Umfang úrslitakeppninnar er meira hjá stelpunum en við höfum átt að venjast undanfarin ár. En átta af ellefu liðum deildarinnar taka þátt í úrslitakeppninni.
Fyrsta rimma Valsstelpna er gegn Haukum og fór fyrsti leikurinn fram í gærkvöldi. Getumunur liðanna er öllum ljós en vonir Hauka felast helst í því að Valsstelpurnar vanmeti eða gerist værukærar gegn minni spámönnum á borð við Hauka. Valsstelpurnar byrjuðu af krafti og skoruðu 6 af fyrstu 7 mörkum leiksins. En á fyrstu 20 mínútum leiksins skoruðu Valsstelpurnar eingöngu mörk af línunni eða úr hornunum. Staðan í hálfleik var 15 - 10 fyrir Val. Athygli vakti að skytturnar áttu eingöngu fjórðung marka liðsins í fyrri hálfleik og komst t.a.m. Hrafnhildur ekki á blað fyrr en á síðustu sekúndum hálfleiksins. En þó svo að þær hafi haft hægt um sig í markaskorun þá voru þær mjög örlátar við línuna hvort heldur Sónötu sem spilaði allan fyrri hálfleik á línunni eða á Dagnýju og Karólínu sem leystu inn á línuna í gríð og erg.
Í upphafi seinni hálfleiks voru það skyttur Valsliðsins sem mættu með hlaðnar byssur og skoruðu hvert markið á fætur öðru. Um miðjan leik var munurinn á liðunum orðinn 10 mörk. Sá munur hélst að mestu til leiksloka og leiknum lauk 27 - 18 fyrir Val.
Markvarsla Jennýjar og Sigríðar var frábær allan leikinn. Jenný spilaði fyrstu 50 mínútur leiksins og varði 24 skot en Sigríður spilaði síðustu 10 mínúturnar og varði 5 skot. Athygli vekur að miðað við leiktíma þá er árangur beggja markvarða mjög svipaður. En það verður að hrósa Sigríði sérstaklega fyrir ótrúlega innkomu á síðustu 10 mínútum leiksins og taka þar við af Jennýju sem hafði átt virkilega góðan leik.
En leikmenn Vals áttu í nokkru basli með að línuna í leiknum. En aldrei hef ég orðið vitni að því að Valsliðið fái dæmt á sig línu jafn oft og gerðist í gærkvöldi. Ekki taldi ég sérstaklega hversu oft þetta gerðist en tilfinningin er sú að þetta hafi gerst nærri tíu sinnum. Það var ekki eins og það væri sami leikmaðurinn sem væri í of stórum skóm heldur virtust leikmenn úr flestum stöðum fá dæmda á sig línu.
Það vakti sérstaka ánægju í gær að sjá Kristínu Guðmundsdóttur koma inn á undir lok leiksins og skora sitt fyrsta mark eftir nærri árs fjarveru vegna barnsburðar. Vel gert Kristín og velkomin til baka!
Helstu tölur: Jenný varði 24 skot, Sigríður 5. Mörk Vals: Dagný 6, Þorgerður 6, Karólína 4, Hrafnhildur 3, Sónata 3, Ragnhildur 2, Heiðdís 1, Kristín 1 og Heiða 1.
Næsti leikur stelpnanna er gegn Haukum á Ásvöllum á laugardaginn kl. 16. Vinni Valur þann leik þá þarf ekki oddaleik og við erum komnar í næstu umferð. Að öðrum kosti verður oddaleikurinn á Hlíðarenda á mánudagskvöldið.
Sigurður Ásbjörnsson