Valur deildarmeistari kvenna í handbolta
Valur varð um helgina deildarmeistari kvenna í handbolta eftir sigur á Haukum í hreinum úrslitaleik um deildarmeistaratitilinn. Valur stóð betur að vígi fyrir leikinn og dugði jafntefli en Haukar urðu að sigra.
Jafnræði var með liðunum í fyrri hálfleik en góður kafli í upphafi síðari hálfleiks lagði grunninn að sigri Valskvenna sem fóru að lokum með 28-22 sigur af hólmi.
,,Agaður sóknarleikur og góður varnarleikur skóp sigurinn" sagði Ágúst Þór þjálfari liðsins í samtali við fjölmiðla eftir leikinn. ,,Við höfum verið í efsta sæti deildarinnar nánast allt mótið. Leikur okkar hefur verið sá jafnbesti af þeim sem lið deildarinnar hafa sýnt fram til þessa. Þess vegna tel ég að ef sanngirni er til í íþróttum þá lýsir hún sér í deildarmeistaratitli okkar í dag"
Valur.is óskar stelpunum og aðstandendum liðsins hjartanlega til hamingju með deildarmeistaratitilinn.