Skólaleikar Vals 2026

Miðvikudaginn 18. mars fóru fimmtándu Skólaleikar Vals fram að Hlíðarenda við frábærar aðstæður.

Á leikunum keppa nemendur í 5.-7. bekk úr Austurbæjarskóla, Háteigsskóla og Hlíðaskóla í fjölbreyttum greinum þar sem leikgleði og samvinna eru í forgrunni. Í ár voru kynntar til leiks nokkrar nýjungar, meðal annars körfuboltakeila í stað hefðbundins körfuboltaskots. Þá var boðhlaupinu breytt þannig að keppendur notuðu badmintonspaða og flugu, auk þess að fara hluta leiðarinnar á bretti. Keppnin var jafnari en nokkru sinni fyrr og stemningin í N1 höllinni náði hámarki þegar leikarnir hófust.

Fyrsta greinin var skotbolti, þar sem skólarnir stóðu nokkuð jafnir. Hlíðaskóli náði þó bestum árangri og sigraði flestar sínar viðureignir. Háteigsskóli fylgdi fast á eftir og Austurbæjarskóli var aðeins tveimur stigum á eftir.

Í körfuboltakeilu, sem var ný grein í ár, var það Háteigsskóli sem stóð uppi sem sigurvegari, með Hlíðaskóla og Austurbæjarskóla skammt undan.

Í boccia-keppninni hafði Háteigsskóli einnig betur, vann fjórar viðureignir á meðan Hlíðaskóli og Austurbæjarskóli unnu eina hvor.

Eftir fyrstu þrjár greinarnar hafði Hlíðaskóli náð sex stiga forskoti og spennan var orðin mikil.

Næst var keppt í boðhlaupi, þar sem Háteigsskóli sýndi mikinn styrk og vann allar sínar viðureignir. Með því náðu þeir þriggja stiga forskoti fyrir lokagreininni, reipitogi. Hlíðaskóli og Austurbæjarskóli enduðu jafnir í þessari grein.

Í reipitoginu mætti Háteigsskóli með forskot og stóð vel undir væntingum. Þrátt fyrir að Hlíðaskóli ynni flestar viðureignir í greininni dugði það ekki til sigurs. Að lokum stóð Háteigsskóli uppi sem sigurvegari Skólaleika Vals 2026, aðeins einu stigi á undan Hlíðaskóla.

Á leikunum var einnig kynntur nýr bikar, Liðsbikarinn, sem veittur er því liði sem sýnir framúrskarandi liðsheild og samvinnu. Austurbæjarskóli hlaut þann heiður í fyrsta sinn fyrir mikla seiglu og samheldni frá upphafi til enda leikanna. Þá fékk Hlíðaskóli viðurkenningu fyrir besta stuðningsmannaliðið, þó öll liðin hafi notið öflugrar hvatningar.