Birta frétt

Aðalfundur Vals fór fram þann 28. maí í hátíðarsal félagsins að Hlíðarenda. Fundurinn var vel sóttur og fór fram með hátíðlegum hætti líkt og venja er hjá félaginu. Á fundinum urðu nokkrar breytingar á stjórn félagsins og deildarstjórnum.

Hafrún Kristjánsdóttir lætur af störfum sem formaður Vals eftir eitt ár í embætti. Ákvörðun hennar kemur til vegna aukinna verkefna í starfi, en Hafrún er prófessor við Háskólann í Reykjavík og hefur meðal annars unnið að mikilvægu verkefni sem styður foreldra barna sem glíma við kvíða.

Verkefnið hlaut nýverið alþjóðlegan þróunarstyrk sem kallar á aukið umfang og veru erlendis næstu misseri. Þrátt fyrir að stíga til hliðar sem formaður mun Hafrún áfram verða félaginu innan handar.

Valur þakkar Hafrúnu innilega fyrir hennar mikilvæga framlag og óeigingjarnt starf í þágu félagsins.

Nýr formaður Vals er Arnar Þór Sævarsson. Arnar starfar sem framkvæmdastjóri Samtaka íslenskra sveitarfélaga og hefur víðtæka stjórnunarreynslu, meðal annars sem bæjarstjóri á Blönduósi og síðar sem aðstoðarmaður ráðherra.

Arnar hefur tengst Val í meira en tvo áratugi. Eiginkona hans, Gerður Beta Jóhannsdóttir, lék um árabil með meistaraflokki kvenna í handknattleik og átti stóran þátt í velgengni liðsins. Þá eiga þau þrjú börn, þar af son sem leikur atvinnumennsku í handknattleik í Þýskalandi og tvær dætur sem æfa handknattleik hjá Val.

Einnig urðu breytingar á deildarstjórnum félagsins og má sjá yfirlit yfir nýjar stjórnir hér: 

Valur býður Arnar Þór hjartanlega velkominn til starfa sem formann félagsins, ásamt öllum þeim stjórnarmönnum og -konum sem taka nú sæti í stjórnum félagsins.

Nokkrar breytingar urðu á stjórnum deilda félagsins á aðalfundi.

Björn Steinar Jónsson gaf ekki kost á sér til áframhaldandi stjórnarstarfa og hefur Styrmir Þór Bragason tekið við sem formaður Knattspyrnudeildar. Eva Gunnlaugsdóttir stígur einnig til hliðar sem formaður Handknattleiksdeildar og tekur Fannar Örn Þorbjörnsson við formennsku deildarinnar.

Svali Björgvinsson lætur af störfum eftir fjölmörg ár sem formaður Körfuknattleiksdeildar. Deildin vinnur nú að því að finna nýjan formann til að leiða starf hennar áfram.

Dagný Rut Gísladóttir heldur áfram sem formaður Barna- og unglingasviðs.

Nánari upplýsingar um skipan stjórna deilda má finna á heimasíðu Knattspyrnufélagið Valur.

Við viljum færa öllu því stjórnarfólki sem hefur lokið störfum okkar bestu þakkir fyrir óeigingjarnt framlag sitt í þágu félagsins. Starfsemi félagsins byggir að stórum hluta á eldmóði, tíma og fagmennsku þeirra sem gefa af sér til sjálfboðastarfa. Framlag þeirra hefur verið ómetanlegt og kunnum við þeim innilega þakkir fyrir þeirra mikilvæga starf í þágu Vals.