SAMÞYKKTIR KNATTSPYRNUFÉLAGSINS VALS
1. grein - Heiti
Félagið heitir Knattspyrnufélagið VALUR. Aðsetur þess er að
Hlíðarenda í Reykjavík.
2. grein - Markmið
Markmið félagsins er að iðka og útbreiða knattspyrnu,
handknattleik og körfuknattleik karla og kvenna.
Félagið er almennt félag og er því heimilt að vera eigandi í
hlutafélögum, standa að stofnun sjálfseignarstofnana o.s.frv.
3. grein - Merki og búningar
Merki félagsins er skjöldur, en grunnur hans sól, sem sendir frá
sér rauða og bláa geisla og í miðjum fleti skjaldarins er fljúgandi
valur með knött í klónum. Á knöttinn skal letra nafnið VALUR.
Búningur félagsins er rauð treyja, hvítar buxur og rauðir
sokkar.
4. grein - Aðild að heildarsamtökum
Félagið er aðili að Í.S.Í. og sérsamböndum þess, eftir því sem
við á hverju sinni.
5. grein - Félagar, félagaskrá og félagsgjöld
Félagi getur hver sá orðið sem óskar þess og samþykkir að taka á
sig þær skyldur er því fylgja. Sérhverjum félagsmanni ber að greiða
félagsgjald til félagsins. Aðalstjórn ákveður félagsgjald árlega.
Greiði félagsmaður ekki félagsgjald sitt næstliðið ár fyrirgerir
hann réttindum sínum skv. 11. gr. samþykkta þessara.
Félagið skal halda félagaskrá á tölvutæku formi.
Aðalstjórn getur kjörið heiðursfélaga úr röðum félagsmanna.
Heiðursfélagar eru undanþegnir greiðslu félagsgjalda.
6. grein - Skipulag félagsins
Aðalfundir og aukaaðalfundir eru æðsta vald í málefnum
félagsins. Aðalstjórn er æðsti aðili í málefnum þess milli
aðalfunda. Aðalstjórn ræður framkvæmdastjóra sem ræður annað
starfsfólk.
Starfsemi félagsins er skipt í þrjú meginsvið: Barna- og
unglingasvið, afrekssvið og rekstrarsvið.
Félagsdeildir með sérstakar stjórnir starfa innan afrekssviðs og
sinna afreksstarfi í knattspyrnu, handknattleik og körfuknattleik.
Sérstök deildarstjórn starfar einnig innan barna- og unglingasviðs.
Deildarstjórnir starfa í umboði og á ábyrgð aðalstjórnar sbr. 16.
gr.
7. grein - Um Hlíðarenda ses
Þann 9. janúar 2013 stofnaði Knattspyrnufélagið Valur
sjálfseignarstofnunina Hlíðarenda.
Tilgangur Hlíðarenda ses er að stuðla að framgangi og að vera
fjárhagslegur bakhjarl Knattspyrnufélagsins Vals.
Markmið stofnunarinnar er að halda utan um, byggja upp,
varðveita og viðhalda þeim eignum og réttindum er stofnunni
tilheyra í þágu vaxtar og viðgangs Knattspyrnufélagsins Vals, en í
þeim tilgangi ráðstafaði Knattspyrnufélagið Valur til
stofnunarinnar hluta af eignasafni sínu.
Stofnunin skal í störfum sínum og gerðum hafa markmið
Knattspyrnufélagsins Vals að leiðarljósi og stuðla að því að efla
iðkun og útbreiðslu þeirra íþrótta sem stundaðar eru af hálfu karla
og kvenna innan vébanda Knattspyrnufélagsins Vals á hverjum
tíma.
Hvers konar ráðstöfun eigna sem ekki samrýmist framangreindum
tilgangi og markmiðum er stofnuninni óheimil.
Ákvæðum í skipulagsskrá Hlíðarenda ses um tilgang og markmið
sjálfseignarstofnunarinnar (nú 3. gr.) og um fasta setu formanns
Vals í stjórn Hlíðarenda ses (6.gr.) verður ekki breytt samkvæmt
skipulagsskránni nema að fengnu samþykki aðalfundar Vals, sbr. 8.
og 9. gr. samþykkta þessara. Þá verður og starfsreglum fjárhagsráðs
sem starfar á grundvelli skipulagsskrár Hlíðarenda ses ekki breytt
nema á grundvelli samþykkis stjórna Vals og Hlíðarenda ses.
8. grein - Aðalfundir félagsins, fundartími, framboð til
stjórna, boðun og breytingar á samþykktum
Aðalfundur félagsins hefur æðsta vald og ákvörðunarrétt í öllum
málum þess. Skal hann haldinn eigi síðar en 31. maí ár hvert.
Auglýsa skal aðalfundinn opinberlega með viku fyrirvara.
Aðalfundurinn telst lögmætur, ef löglega er til hans boðað.
Hver félagsmaður á rétt á því að fá ákveðið mál tekið til
meðferðar og ákvörðunar á aðalfundi ef hann gerir skriflega eða
rafræna kröfu þar um eigi síðar en þremur dögum fyrir aðalfund.
Tillögur til breytinga á samþykktum félagsins skal senda
aðalstjórn eigi síðar en viku fyrir aðalfund. Heimilt er þó að taka
fyrir á aðalfundi tillögur til breytinga á samþykktum félagsins,
sem síðar koma fram ef 2/3 hluta atkvæðisbærra fundarmanna eru því
samþykkir.
Framboð til setu í aðalstjórn og félagsdeildum þurfa að berast
með skriflegum/rafrænum hætti til aðalstjórnar eigi síðar en
tveimur virkum dögum fyrir aðalfund.
9. grein - Dagskrá aðalfundar
Dagskrá aðalfundar skal vera sem hér segir:
- Formaður félagsins setur fundinn.
- Kosinn fundarstjóri.
- Kosinn fundarritari.
- Fundargerð síðasta aðalfundar lögð fram til samþykktar.
- Formaður félagsins leggur fram skýrslu aðalstjórnar um
starfsemi og framkvæmdir á liðnu starfsári.
- 6. Framkvæmdastjóri félagsins leggur fram og útskýrir
endurskoðaða reikninga félagsins fyrir liðið starfsár til
samþykktar.
- Framkvæmdastjóri félagsins leggur fram rekstraráætlun næsta
starfsárs.
- Breytingar á samþykktum sbr. 8., 10. og 22. gr.
- Kosinn formaður til tveggja ára í senn.
- Kosnir níu stjórnarmenn en fjórir þeirra skulu jafnframt vera
kosnir formenn deildarstjórnar barna- og unglingasviðs,
knattspyrnudeildar, handknattleiksdeildar og
körfuknattleiksdeildar. Aðalstjórnarmenn skulu kjörnir til tveggja
ára í senn.
- Kosnir þrír til sex stjórnarmenn í stjórn hverrar deildar.
Heimilt er einnig að kjósa allt að 5 varastjórnarmenn fyrir hverja
deild.
- Kosnir þrír til sex stjórnarmenn í minjanefnd félagsins.
- Kosinn löggiltur endurskoðandi eða endurskoðunarfélag og einnig
2 félagslegir skoðunarmenn.
- Önnur mál.
10. grein - Atkvæðagreiðslur á aðalfundi félagsins
Á aðalfundi félagsins ræður einfaldur meirihluti úrslitum mála,
nema þegar um er að ræða tillögur til breytinga á samþykktum
félagsins, en þær verða að samþykkjast af 2/3 atkvæðisbærra
fundarmanna. Kosningar skulu vera skriflegar sé þess óskað. Séu
atkvæði jöfn skal kosning endurtekin. Verði atkvæði þá enn jöfn
skal hlutkesti ráða.
11. grein - Kjörgengi, atkvæðisréttur og tillöguréttur á
aðalfundi félagsins
Allir skuldlausir félagsmenn 18 ára og eldri hafa kjörgengi til
stjórnarstarfa, atkvæðisrétt, tillögurétt og málfrelsi á aðalfundi
félagsins.
12. grein - Aukaaðalfundur félagsins
Aukaaðalfund félagsins má halda ef aðalstjórn álítur þess þörf
eða ef þess er óskað skriflega af a.m.k. 10% kjörgengra
félagsmanna.
Aukaaðalfundur er lögmætur sé til hans boðað skv. ákvæðum 8 gr.
samþykktanna.
13. grein - Reikningsár
Reikningsár er frá og með 1. janúar til og með 31. desember ár
hvert.
14. grein - Verkefni aðalstjórnar
Aðalstjórn ber að efla félagið á allan hátt og gæta hagsmuna
þess í hvívetna. Hún hefur umráðarétt yfir eignum félagsins og
markar stefnu þess milli aðalfunda. Aðalstjórn skipar alla
trúnaðarmenn félagsins í nefndir og ráð innan
íþrótta-hreyfingarinnar, sem félagið á aðild að. Aðalstjórn skipar
fulltrúa í sérráð Í.B.R. á aðalfundi sérráða Í.B.R. og á ársþing
sérsambanda Í.S.Í. að fenginni umsögn stjórna einstakra deilda.
Aðalstjórn kemur fram út á við fyrir hönd félagsins og ritar
nafn þess. Þá veitir aðalstjórn framkvæmdastjóra prókúruumboð.
Halda skal fundagerðir um stjórnarfundi og þær ákvarðanir sem
þar eru teknar.
15. grein - Skipan aðalstjórnar
Aðalstjórn skipa tíu menn, formaður félagsins sem kosinn er á
aðalfundi og níu meðstjórnendur kjörnir á aðalfundi, sem skipta með
sér verkum þannig: varaformaður, fjórir meðstjórnendur auk formanna
deildarstjórna barna- og unglingasviðs, knattspyrnudeildar,
handknattleiksdeildar og körfuknattleiksdeildar.
Formaður boðar fundi í stjórn þegar hann telur þess þörf, eða ef
einn stjórnarmaður óskar þess. Meirihluti atkvæða ræður úrslitum
mála. Stjórnarfundir eru löglegir ef meirihluti stjórnar er
mættur.
16. grein - Um starfssvið framkvæmdastjóra
Framkvæmdastjóri er ráðinn af aðalstjórn og starfar í umboði
hennar.
Framkvæmdastjóri ræður allt annað starfsfólk, þ.m.t. starfsfólk
skrifstofu, þjálfara, leikmenn og umsjónarfólk húsnæðis.
Framkvæmdastjóri annast daglegan rekstur félagsins og skal í þeim
efnum fara eftir þeirri stefnu og fyrirmælum sem aðalstjórn hefur
gefið. Hann hefur ásamt formönnum deildarstjórna umsjón með gerð
rekstraráætlana fyrir félagið og ber ábyrgð á framkvæmd þeirra.
Hinn daglegi rekstur tekur ekki til ráðstafana sem eru óvenjulegar
eða mikils háttar. Slíkar ráðstafanir getur framkvæmdastjóri aðeins
gert samkvæmt sérstakri heimild frá aðalstjórn, nema ekki sé unnt
að bíða ákvarðana aðalstjórnar án verulegs óhagræðis fyrir
starfsemi félagsins. Í slíkum tilvikum skal aðalstjórn tafarlaust
tilkynnt um ráðstöfunina. Framkvæmdastjóri skal sjá um að bókhald
félagsins sé fært í samræmi við lög og venjur og meðferð eigna
félagsins sé með tryggilegum hætti. Aðalstjórn skal annast um að
nægilegt eftirlit sé haft með bókhaldi og meðferð fjármuna
félagsins.
Samningar sem gerðir eru fyrir hönd Knattspyrnufélagsins Vals
og/eða einstakra deilda þess um hvað eina skulu staðfestir með
áritun framkvæmdastjóra. Ella skuldbinda þeir ekki félagið.
17. grein - Starfssvið félagsdeilda í barna- og unglingasviði,
knattspyrnu, handknattleik og körfuknattleik.
Hver félagsdeild skal hafa sérstaka stjórn sem kjörinn er á
aðalfundi félagsins, sbr. 8. gr. Starfsár félagsdeildar er það sama
og aðalstjórnar. Hver félagsdeild skal hafa aðskilin fjárhag í
aðalbókhaldi félagsins.
Formaður viðkomandi félagsdeildar boðar til stjórnarfunda
deildar eftir því sem þörf krefur. Framkvæmdastjóri vinnur með
deildarstjórnum og situr á fundum þeirra, sé tilefni til. Skal hann
vera með málfrelsi og tillögurétt á deildarstjórnarfundum. Verkefni
félagsdeildar á afrekssviði er að stýra afreksstarfi viðkomandi
íþróttagreinar, stuðla að framgangi hennar, skipulagi og kynningu
út á við.
Verkefni félagsdeildar barna- og unglingasviðs er að stýra
barna- og unglingastarfi í öllum íþróttagreinum félagsins, stuðla
að framgangi þeirra, skipulagningu og kynningu út á við. Þá skulu
stjórnir einstakra félagsdeilda standa að fjáröflun til styrkingar
starfi og rekstri viðkomandi deildar.
Stjórnir deilda starfa í umboði og á ábyrgð aðalstjórnar.
Stjórnum deilda er óheimilt að skuldbinda félagið fjárhagslega.
Í lok hvers starfsárs skal hver deildarstjórn skila til
aðalstjórnar starfsskýrslu fyrir liðið ár og áætlun um fjárþörf
fyrir næsta starfsár. Starfsskýrslur skulu birtar í sameiginlegri
skýrslu félagsins á aðalfundi.
18. grein - Minjanefnd
Minjanefnd skal starfa á vettvangi félagsins. Stjórn hennar
skipa að lágmarki 3 en að hámarki 6 stjórnarmenn sem kjörnir eru
árlega á aðalfundi Vals. Stjórn skiptir sjálf með sér verkum og kýs
sér þar á meðal formann. Minjanefnd er heimilt að kalla til sín
aðra aðila til samstarfs ef þörf krefur.
Hlutverk minjanefndar er að safna, skrásetja og varðveita
verðlaunagripi sem félagið vinnur til í keppni auk annarra gripa og
ljósmynda sem félaginu berast. Nefndin sinnir jafnframt
sýningarhaldi, bæði föstum sýningum og sýningum sem settar eru upp
af ákveðnu tilefni. Markmiðið er að sameiginlegur arfur allra
félaga í Val verði sýnilegur og stuðla þannig að aukinni samkennd
innan félagsins og skapa jákvæða ímynd þess og styðja þá iðkun og
starfsemi sem þar fer fram, á víðum grundvelli.
Um nánari starfshætti minjanefndar gilda starfsreglur sem
samþykktar eru á aðalfundi Vals.
19. grein - Fulltrúaráð
Fulltrúaráð skal vera starfandi innan félagsins samkvæmt
sérstökum reglum sem samþykktar eru á aðalfundi félagsins.
20. grein - Viðurkenning, heiðursmerki
Aðalstjórn veitir viðurkenningu fyrir íþróttaárangur eða störf í
þágu félagsins eða íþróttahreyfingarinnar samkvæmt sérstökum reglum
sem samþykktar eru á aðalfundi félagsins. Þá kýs aðalstjórn
heiðursfélaga.
21. grein - Veðsetninga- og framsalsbann
Val verður, svo sem verið hefur, óheimilt að framselja eða
veðsetja fasteignir í eigu félagsins. Það á þó ekki við um framsal
eigna til Hlíðarenda ses sem gert yrði á grundvelli samþykkta Vals
og skipulagsskrár Hlíðarenda ses.
22. grein - Félagsslit
Verði félagið í heild óstarfhæft í 5 ár samfleytt, skal því
slitið og skulu eigur þess þá renna til Hlíðarenda ses.
23. grein - Siðanefnd
Á vettvangi félagsins og um starfsemi þess gilda sérstakar
siðareglur sem samþykktar skulu vera á aðalfundi félagsins.
Á grundvelli reglnanna skal á hverjum tíma starfa sérstök
þriggja manna siðanefnd. Hana skipa starfandi íþróttafulltrúi
félagsins og tveir fyrrverandi aðalstjórnarmenn sem kjörnir skulu
til tveggja ára í senn af aðalstjórn félagsins á hverjum tíma.
24. grein - Viðurlög
Hafi meðlimur félagsins brotið samþykktir þess með framkomu
sinni, hnekkt áliti félagsins og markmiði verulega, skal honum
hegnt með brottrekstri úr félaginu samkvæmt ákvörðun aðalstjórnar.
Úrskurður hennar er því aðeins gildur að 4/5 aðalstjórnar sé honum
samþykkir. Skylt er aðalstjórn að boða hinn brotlega á sinn fund og
gefa honum kost á að tala máli sínu. Ákvörðun aðalstjórnar skv.
þessari grein verður borinn undir aðalfund félagsins.
24. grein - Breytingar á samþykktum
Ekki má breyta 1. og 22. grein samþykkta þessara.
Samþykktum þessum mál ekki breyta nema á aðalfundi félagsins og
þarf til þess samþykki 2/3 hluta atkvæðisbærra fundarmanna, sbr. 8.
og 10. gr.
Tillögur til breytinga á samþykktum félagsins skulu tilkynntar
með aðalfundarboðinu og skulu þær liggja frammi hjá aðalstjórn
félagsins eigi skemur en 7 dögum fyrir aðalfund félagsins.
Um aðkomu félagsins að breytingum á Skipulagsskrá Hlíðarenda
ses, sbr. 7. gr., fer að öllu leyti eftir samþykktum þessum um
breytingar á þeim, að breyttu breytanda.
26. grein - Gildistaka
Samþykktir þessi öðlast þegar gildi og jafnframt falla úr gildi
eldri samþykktir félagsins.
Ákvæði til bráðabirgða vegna breytinga á samþykktum á aðalfundi
2025- Kjör formanns, aðalstjórnar og stjórnarmanna í deildum.
Ákvæði samþykkta þessara um kjör stjórnarmanna aðalstjórnar og
deilda skal hagað í samræmi við breyttar samþykktir að loknum
aðalfundi 2025.
Umboð núverandi formanns og stjórnarmanna knattspyrnudeildar til
stjórnarsetu, en þeir voru kjörnir á haustfundi 2024, framlengist
til aðalfundar félagsins 2026.
Á fyrsta aðalfundi félagsins sem haldinn verður að samþykktum
þessum breyttum skal haga kjöri stjórnarmanna, samkvæmt 10. tölulið
9. gr. þannig að þrír meðstjórnendur skulu kjörnir til eins árs sem
og formenn deildarstjórna barna- og unglingasviðs og
körfuknattleiksdeildar. Aðrir aðalstjórnarmenn, þ.m.t. formenn
deildarstjórna knattspyrnu- og handknattleiksdeilda skulu kjörnir
til tveggja ára.
Að öðru leyti öðlast breytingar þessar á samþykktum félagsins
þegar gildi.
Þannig samþykkt á aðalfundi Knattspyrnufélagsins Vals. 27. apríl
2023 og breytt síðast með samþykki aðalfundar félagsins 21.
maí 2025.
